Como cada ano por estas datas, co gallo da celebración da conversión de San Pablo e da onomástica de San Tomé de Aquino, a Fundación Universitaria San Pablo CEU e a Universidade de Vigo outorgaron os premios á excelencia académica.
Así,este martes, 28 de xaneiro, tivo lugar o acto de conmemoración de San Tomé de Aquino na Universidade de Vigo, no que esta institución condecora aos expedientes máis brillantes. É un recoñecemento á excelente traxectoria académica do alumnado co que a Universidade de Vigo pretende alentar a dedicación ao estudo. As nosas alumnas galardoadas polos premios extraordinarios de fin de grao foron Andrea Álvarez Fernández (Grao en Educación Infantil) e Sara García López (Grao en Educación Primaria), que non puido asistir ao acto.
Pola súa banda, o pasado 24 de xaneiro, en Madrid entrégaronse os premios CEU Ángel Herrera que nesta edición foron para a profesora Miriam Varela (Premio CEU Ángel Herrera ao Mellor Labor Docente) e para a alumna Patricia Farrapeira do Grao de Educación Infantil (Premio CEU Ángel Herrera á Mellor Alumna)
Parabéns a todas elas pola súa excelencia!