Día da Biblioteca, xoves 24 de outubro
Celebramos o día da Biblioteca e gustaríanos contar coa vosa participación.
Leede detidamente a seguinte mensaxe e anotádevos antes do 24 na biblioteca!
Nin bicos nin paisaxes. A cor desaparece das ilustracións de varios exemplares da nosa Biblioteca.
Tras o roubo de De que cor é un bico? outro estraño enigma atormenta ás bibliotecarias.
O pasado mes de maio demos o aviso do roubo do exemplar De que cor é un bico da nosa Biblioteca. O que non sabíamos que case cinco meses despois a historia repetiríase, pero doutro xeito. Segundo Rosa e mais Alicia, foi algo sutil. “De súpeto, nunha devolución, comprobei que Teo tiña o pelo con canas e non entendín nada”, sinala Rosa. Alicia, máis resolutiva, quitoulle importancia: “Eses libros son do ano da polca, é normal que vaian perdendo cor”. Pero a Rosa, que ten nome de cor, aquilo non lle acaba de cadrar ben e foi mirar outros libros. O primeiro que comprobou foi que o cueiro de ¿Puedo mirar tu pañal? seguise a ser de cor branca, pero descubriu que todo o libro estaba en branco e negro. Correndo ensinoullo a Alicia, porque a súa teoría de que afectaba só a libros antigos e descatalogados xa non era válida. Xuntas, e mira que isto non lles gusta, quitaron toda a tira de libros de LIX e descubriron que o branco e negro apoderarase de boa parte deles. “Eran como fotocopias de mala calidade. A edición fermosa que temos de Babar, de Alicia no país das Marabillas… Non entendíamos nada. Só libros como Gato y Pez seguían tendo sentido”, afirman moi impactadas. Polo de agora sábese que hai libros afectados no andel de literatura infantil e xuvenil e mais no de psicoloxía, pero, como sinalan, “Ninguén espera cores nun manual de psicoloxía”.
Así as cousas, as nosas bibliotecarias reclaman a colaboración dos usuarios para dar coa criatura ou criaturas que están a roubarlle a cor ás ilustracións dos libros. Por iso, convidan a aquelas persoas interesadas en resolver o enigma a que acudan á Biblioteca para que coas pistas que o presunto(s) culpable(s) lles deixaron para dar con el ou eles.
A colaboración pode ser individual ou en grupo e haberá unha recompensa para os que consigan resolver o enigma.
