O pasado xoves a Escola inaugurou con toda solemnidade o curso académico 2024/2025. Dende as 11.30 h suspendéronse as clases para asistir a Eucaristía, oficiada polo noso capellán Uxío Nerga, que nos lembrou na súa homilia que aínda que ás veces todo se nos veña enriba como a Xob ou non entedamos o porqué das cousas (e seguro que neste curso vai pasar) debemos confiar no Señor para saírmos adiante. De seguido, no acto académico, a secretaria da Escola, a profesora Sandra Álvarez, deu lectura a memoria académica do curso pasado no que se recollen aquelas actividades e feitos máis significativos. Bieito Rubido, director do xornal El debate e cunha longa traxectoria como xornalista, foi o encargado de dar a lección inaugural que versou sobre como as novas tecnoloxías mudaron os medios de comunicación e o xeito de informarse e subliñou a necesidade de ter medios de comunicación independentes e rigorosos. Na súa charla, Rubido animou tamén o alumnado a retar o algoritmo, a despistalo para que non só ofreza o que queremos ver/ler. O acto concluíu co Gaudeamus igitur, pois si, gaudeamus, que temos por diante un curso ben interesante.

Na Escola estamos en período electoral. Participa presentando a túa candidatura ou ben elixindo o teu representante! A Escola facémola entre todos!