Na V edición do Concurso de Fotografía «Donas de Si», dedicado a capturar a esencia e o cotián das mulleres en diversas contornas, a imaxe titulada «Crecer no rural» alzouse co primeiro premio. O concurso, que xa se converteu nun clásico nos últimos anos na Escola polo seu enfoque na representación da muller na sociedade en distintos eidos, recibiu unha ampla variedade de imaxes que reflectían a diversidade de roles e experiencias das mulleres en diferentes ámbitos. Desde escenas familiares ata retratos no traballo ou na comunidade, cada fotografía narraba unha historia única e poderosa. Con todo, foi a obra de Alicia Correa Chamadoira, alumna de 3º curso do Grao de Educación Infantil, a máis valorada polo público. A imaxe presenta unha escena conmovedora que mostra a unha nena cun chibo no colo. Dúas criaturas pequenas con todo o futuro por diante.