Hai unha vida máis alá das nosas aulas, iso xa o sabermos, pero ás veces os éxitos dos que temos máis próximos pasan desapercibidos. Un claro exemplo témolo na nosa compañeira de 2º de Educación Infantil, Andrea López. No mes de novembro tivo que ausentarse uns días, porque debía competir co seu equipo Club de Patinaxe Artística Gondomar nos Xogos Mundiais de Patinaxe que se celebraban en Bos Aires. Co seu equipo, Andrea executou unha coreografía con gran destreza, sincronización e técnica que lles valeu unha medalla de bronce. Despois dese éxito, Andrea volveu a clase coma se nada, pero abofé que combinar estudos e deporte non é doado, sobre todo cun deporte con tanta esixencia coma este. Parabéns a ela, e tamén a todos os que compaxinan os seus estudos con outros deportes.