A semana pasada, do 26 ao 28 de novembro, varias profesoras do noso centro participaron no XXVI Congreso Internacional da SIDLL, celebrado en Guadalajara, centrado no desenvolvemento das habilidades comunicativas na aula de Lingua e Literatura: investigación e ensino. O máis especial foi facelo acompañadas de antigas alumnas que son mestras de Educación Infantil. Xuntas presentaron traballos sobre literatura infantil e xuvenil, o desenvolvemento da competencia literaria e a análise dos episodios de lectura nun club de lectura. É un orgullo ver como estas alumnas manteñen viva a súa curiosidade e o interese por aprender, e como pequenos proxectos que xurdiron durante o seu paso pola Escola poden medrar ata converterse en comunicacións e publicacións académicas.
Experiencias como esta amosan que a escola non remata nas clases: a aprendizaxe pode converterse en exploración, investigación e presentación de ideas en espazos profesionais e académicos.
